Павлодар облысының ауылдық колледждері 2025–2027 жылдарға арналған өзара ынтымақтастық іс-шаралар жоспары аясында өткізілген «Менің мамандығым – менің мақтанышым» атты облыстық қашықтық конкурсының нәтижелері 4 желтоқсан күні жарияланды.

Конкурстың мақсаты – аграрлық бағыттағы колледж студенттерінің кәсіби және цифрлық құзыреттерін дамыту, таңдалған мамандыққа қызығушылығын арттыру және цифрландыру жағдайында жұмысшы мамандықтарының беделін көтеру болды.

«Жұмысшы мамандықтар жылы» аясында ұйымдастырылған байқау талаптарына сәйкес, қатысушылар өз таңдаған мамандығы туралы ұзақтығы 2 минутқа дейінгі бейнеролик дайындады. Студенттер бейнежобаларында мамандық ерекшеліктерін, оның қоғамдағы маңызын, өндірістік дағдыларды және заманауи технологияларды қолдану мүмкіндіктерін көрсетті.

Қазылар алқасы жұмыстарды мазмұн тереңдігі, шығармашылық тәсіл, цифрлық құралдарды қолдану сапасы және мамандықты ашып көрсету деңгейі бойынша бағалады.

Жарыс нәтижелері төмендегідей болды:

1. I орын – «Ertis» жоғары инновациялық аграрлық колледжі
2. II орын – Шарбақты аграрлық-техникалық колледжі
3. III орын – Успенка және Теренкөл аграрлық-техникалық колледжі
4. Железинка және Баянауыл колледждерінің студенттері Сертификаттармен марапатталды

Конкурс ауыл шаруашылығы саласындағы мамандықтарды дәріптеуге, жастардың кәсіби бағдарын нығайтуға және аграрлық колледждер арасындағы ынтымақтастықты арттыруға үлес қосты.

4 желтоқсан күні Павлодар облысының ауылдық колледждері 2025–2027 жылдарға арналған өзара ынтымақтастық іс-шаралар жоспары аясында Тереңкөл аграрлық-техникалық колледжінде кәсіптік оқыту шеберлері арасында «Аспаздық» құзыреті бойынша «Bocuse d’Or» өңіраралық кәсіби конкурсы ұйымдастырылды.

Байқау ережесі қатысушыларға құпия түрде екі күн бұрын ғана ұсынылып, олар үш модуль бойынша тағамдар әзірлеуі тиіс болды:

Модуль 1 – Жасымық сорпасы;

Модуль 2 – Қуырылған көкөністер қосылған сиыр еті стейкі;

Модуль 3 – Шағын асшаяндардан дайындалған тәбет ашар тағам.

Өңіраралық додаға жалпы 7 колледж қатысты. Әрбір қатысушы өз шеберлігін, аспаздық дағдысын және уақытты тиімді жоспарлау қабілетін көрсетуге мүмкіндік алды.

Аталған беделді конкурсқа біздің оқу орнымыздан өндірістік оқыту шебері Кошанова Кызылгүл Бахтыбаевна қатысып, өз кәсіби тәжірибесі мен шеберлігін танытты.

Қазылар алқасының бағалауы бойынша жүлделі орындар келесідей бөлінді:

I орын – Тереңкөл аграрлық-техникалық колледжі,

II орын – Ертіс аграрлық-техникалық колледжі,

III орын – Железинка аграрлық-техникалық колледжі.

Бұл іс-шара аймақ колледждері арасындағы кәсіби ынтымақтастықты нығайтып, аспаздық құзыретті дамытуға серпін берді. Конкурс қатысушылары өзара тәжірибе алмасып, болашақта бірлескен жобаларды жүзеге асыру мүмкіндіктерін талқылады.